CEBU, Philippines - Daghan ang nahibulong ug nakapangutana kung unsay ipasabot sa tarpaulin nga gibitay diha atubangan sa Cebu International Convention Center (CICC) nga dunay suwat nga “Never Again.”
Ang maong tarpaulin dalag ang kolor ug may suwat nga kolor itom hinungdan nga klaro kaayo kini bisan sa layo tan-awon.
Ang mga opisyal sa Kapitolyo nga gilangkuban sa provincial legal officer, Orvi Ortega, Public Information Officer (PIO), Ethel Natera ug provincial engineer, Hector Jamora kinsa miyembro usab sa official committee sa CICC namalibad kabahin niini. Matud nila wa silay kalibutan kabahin sa maong tarpaulin.
Ang CICC ebidensiya sa kasong anti-graft nga gipasaka sa Kapitolyo batok kang kanhi gobernador ug karon 3rd District Congresswoman Gwendolyn Garcia.
Ang igsuon ni Garcia nga si Winston Garcia mokandidato sa pagka-gobernador sa lalawigan sa 2016.
Ang CICC planong himuong expo center sa Department of Trade and Industry (DTI).
Ang Ombudsman Visayas mihatag na og pagtugot sa pagpaayo sa CICC niadtong Hulyo 6, 2015. (Brenda D. Batuto/EIM)(BANAT NEWS)