CEBU, Philippines - Usa ka gipasanginlang notadong sakop sa usa ka dakong grupo sa mga tulisan nga nag-operate dili lang sa Sugbo kondili hasta sa ubang mga probinsya ang matud pa nituyo nga magpadakop sa kapolisan niadtong adlaw nga Martes.
Matud pa sa kapolisan ang suspek nga si Ruel “Yoyong” Remedios, 37, taga barangay Sto. Niño sa lungsod sa Mahayag, Zamboanga del Sur sayon ra kaayo nilang nasikop ug gitanggong na karon sa Police Regional Office-7.
Sumala pa ni Superintendent Rex Derilo, acting chief sa Regional Intelligence Division-7, adunay upat ka mga warrants of arrest sa pagpanulis si Remedios tungod sa iyang kalambigitan sa mga pagpanulis didto sa Dumaguete City sa Negros, Tagbilaran City ug sa Metro Cebu.
Si Remedios matud pa nalambigit sa 8 E-Bingo Club robbery sa Mandaue City niadtong bulan sa Marso ning tuiga diin nadala sa grupo ang dul-an P1.5 milyon nga cash.
Adunay kauban nga pito ka wala pa madakpi nga mga tulisan si Remedios atol sa maong hitabo.
Si Remedios nalambigit usab sa pagtulis sa MyGold Pawnshop sa dalan Colon diha sa barangay Santo Niño, Cebu City pagkasunod bulan (Abril). Sumala pa ni Derilo ang pagkasikop kang Remedios nahimo pinaagi sa pagtinaba-ngay sa mga sakop sa Police Regional Office-9 (Zamboanga Peninsula) ug Police Regional Office-7 (Central Visayas).
Ang mga warrants of arrest nga gihuptan sa kapolisan dinhi batok sa grupo ni Remedios giisyu ni Regional Trial Court Judge Soliver Peras.
"Naa siya’y feelers. Although he was arrested because naa man siya’y warrant but wa na mi naglisod,”pasabot pang Derilo.
Si Remedios diha nadakpan sa iyang balay sa Mahayag ug dali dayong mitahan sa iyang kaugalingon ngadto sa kapolisan.
Matud pa niya, gikapoy na siya pagsige og tago ug dili siya buot nga tibuok niyang kinabuhi siyang magtagotago gikan sa balaod.
Sumala pa niya, gusto na siyang magbag-o ug andam siyang mokooperar sa kapolisan ug moatubang sa tanang mga kaso nga gisang-at batok kaniya. (Gikan sa The Freeman/EIM)(BANAT NEWS)