CEBU, Philippines - Gipahimangnuan ni Konsehal Valeriano Ylanan sa Siyudad sa Talisay ang tanang nanag-iya og electronic tricycle nga panakpon gyud sila kun walay ikapakitang rehistro gikan sa Land Transportation Office (LTO) ilang mga sakyanan.
Si Ylanan kinsa tsirman sa City of Talisay-Traffic Operation Development Authority (CT-TODA) nakigtagbo sa mga nanag-iya og electronic tricycles human siya makadawat og petisyon gikan sa mga drayber sa traysikol.
Nipiyait ang mga drayber gumikan kay naapektuhan ilang kita sa pagbutho sa e-tricycles nga namasahero sa bisan asang lugar sa Talisay.
Base sa ilang petisyon, sila mga tricycle driver ang nagparehistro sa ilang unit ug mikuha pa og prangkisa aron legal silang makapamasahero apan ang e-tricycles wala niini ug nahimo pa nilang kompetensiya.
Gibanabanang moabot og 50 ka e-tricycles ang nagbiyahe sa siyudad, ang gigamit sa pamasahero, sa negosyo ug personal nga sakyanan sa pamilya.
Si Ylanan nagkanayon nga kun walay rehistro ang maong tricycles ilegal kini.
Hinuon si Ylanan miasoy nga aduna pa unya silay pagahimuon nga laing panagtigom uban sa mga tricycle drayber nga nipetisyon aron sabotan pa gyud ang ilang angay buhaton. Kadtong makapamatuod nga wala mamasahero dili madakop sa mga enforcer.
Apan si Boy Solera, area manager sa Racal Motors nga maoy tighimo niini miingon nga giproseso na nila ang rehistro sa ilang produkto diha sa LTO.
Hinuon iyang giklaro nga dili kini madali busa nihangyo siya sa CT-TODA nga dili lang una estriktuhon ang pagdakop sa ilang mga produkto.
Ang e-tricycle gikan sa nasud nga Japan ug gigamit sa mga Hapon didto sa ilang nasud tungod kay eco-friendly kini, walay saba, way aso ug i-charge lang ang baterya sa kuryente.
Modagan lang og 40 kph ug makakarga og lima ngadto sa unom ka mga tawo ug nagkantidad lang og P95 mil ang unit ug pwede kining ma-installment pinaagi sa pagbayad og P120 matag adlaw.
Si Calixto Lorenzana, usa ka trisikad drayber kaniadto ang nikuha og e-tricycle tungod sa kasayon dad-on niini kay di na man siya motindak ug makakarga pa og daghang pasahero. (BANAT NEWS)