CEBU, Philippines – Gimanduan ni Mayor Michael Rama ang Cebu City Legal Office nga magpahigayon og kaugalingong imbestigasyon sa reklamo ni kanhi kongresista ug mayor Tomas Osmeña sa pagkalangan sa pagtukod pagbalik sa Unit 2 sa Carbon Public Market.
Matud ni City Atty. Jerone Castillo nga nimando si Rama nga magpahigayon og kaugalingong imbestigasyon ang kagamhanan sa dakbayan.
Dugang ni Castillo nga base sa mga dokumento nasuta nila nga adunay Notice of Awards ug Notice to Proceed ngadto sa Geety Realty & Development Corporation hinungdan nga ang mga sakop sa Bids and Awards Committee paesplikahon sa panghitabo sa mao’ng kontrata.
Si Osmeña nagplano nga mopasaka og kaso batok ni Rama tungod sa kalangan sa pagtukod pagbalik sa Carbon Public Market Unit 2 bisan og may kontrata na ang proyekto nga humanon sa usa lang ka tuig.
Gipadad-an og suwat ni Osmeña si Rama aron magpakisayud sa kalangan ilabi na ang pag-award sa proyekto ngadto sa Geety Realty & Development Corporation bisan og ang mao’ng construction company dili unta takus nga makasalmot sa subasta.
Si Osmeña nakakuha og kopya sa Circular No. 001 sa Philippine Contractors Accreditation Board nga ang mga contractors nga makasalmot sa mga proyekto nga kantidad og sobra sa P150 milyones kinahanglang adunay lisensya nga Category AAA.
Ang City Hall ni-award sa proyekto sa Geety Realty and Development Corporation kay mao kini ang nitanyag og labi’ng ubos nga kantidad nga P167 milyones.
Base sa kontrata nga humanon ang proyekto sulod lang sa usa ka tuig apan gikan niadto’ng 2013 hangtud karon wala pa mahuman ang pagtukod sa merkado.
Matud ni Osmeña nga ang City Hall nitugot pa nga mahatagan og P25 milyones nga pasiuna’ng bayad ang kontraktor.
Si Osmeña niingon nga gisusi karon sa Bureau of Internal Revenue (BIR) ug sa Department of Trade and Industry (DTI) ang mao nga kontraktor tungod kay nagduda sila sa mga dokumento nga gisumiter aron nga makakuha og financial qualification sa tuig 2014-2015. - /GMR) (BANAT NEWS)