CEBU, Philippines – Grabe’ng naangol ang usa ka 54-anyos nga biktima sa pagpanigbas sa iya’ng silingan sa barangay Camansi, dakbayan sa Danao alas 9 pasado sa niagi’ng Domingo sa gabii.
Si Police Officer 3 Marlon Remolla sa Danao City Police Station niila sa biktima nga si Fernando Magdadaro Perez samtang ang nagtigbas mao si Richard Rosales, hingkod ang panuigon nga silingan sa biktima sa mao’ng dapit.
Matud ni Remolla nga nakig-inom ang biktima sa iya’ng higala nga silingan lang usab diha’ng kalit nitumaw ang suspek nga masuk-anon nga nakaaghat sa biktima sa pagpangutana sa hinungdan sa kasuko niini.
Ang suspek nga nagdala na og sundang niadto’ng higayuna ang kalit nanigbas ngadto sa biktima nga nakaingon sa pagkasamad sa bukton, abaga, ulo ug uban pa’ng bahin sa lawas hinungdan nga dali nga gidala sa Danao Provincial Hospital samtang ang suspek dali nga nisibat.
Si Remolla niingon nga wala sila makakita og laing hinungdan sa pagpanigbas kun dili mao lang ang kasaba sa biktima ug sa gikainom nga higala. - /GMR) (BANAT NEWS)