CEBU, Philippines – Nagduda karon ang kanhi piskal nga nikuwestiyon sa pagbaligya sa luna sa South Road Properties kun nganong ang mga kaso batok sa kagamhanan sa dakbayan sa Sugbo anha husayon sa Regional Trial Court Branch 9 ubos ni Judge Alexander Acosta.
Kini usab ang nakapaaghat kang Romulo Torres, pinaagi ni Atty. Janice Lape, sa pag-awhag sa korte nga ibalik ang iyang kaso sa unang nagkupot niini nga si RTC Branch 23 Judge Generosa Labra human ang iyang gipangayo nga temporary restraining order gibasura ni Acosta.
Si Torres niduso na usab sa iyang position paper sa pagsupak sa motion to dismiss nga gipasaka sa mga abogado sa City Hall.
Gipadayag ni Torres nga nagrepresentar siya sa daghang magbubuhis sa iyang pagduso sa petisyon.
Iyang gitumbok ang kaso sa Chavez vs. Public Estates Authority, 433 Phil, 2002, diin gikwestiyon sa gobyerno ang pagkatawo sa usa ka magbubuhis nga niawhag sa pagpadayag sa mga kasayuran sa pagbaligya sa binilyon nga kantidad sa yuta.
Apan ang Korte Suprema niila sa katungod sa usa ka tawo nga masayod nga nalatid sa konstitusyon.
Matud ni Torres nga bisan ang gagmay’ng bata makakiha sa ilang kaugalingon alang sa kaayuhan sa mosunod nga henerasyon.
Dugang ni Torres nga ang iyang petisyon maoy tubag sa pangutana kung legal pa ang pagtugot sa konseho sa dakbayan kang Rama nga makabaligya sa luna sa SRP. - /EIM) (BANAT NEWS)