CEBU, Philippines – Giaprobahan niadto’ng Miyerkules sa Provincial Development Council ang P520 milyones nga 2016 Annual Investment Plan sa probinsiya.
Sa mao’ng kantidad, P146.666 milyones niini ang gigahin sa road construction, pagpaayo o rehabilitasyon sa kadalanan lakip na ang World Bank-funded Philippine Rural Development Program (PRDP).
Ang PRDP Provincial Management Office niila sa siyam ka road links nga malakip sa funding sa 2016 AIP nga nahimutang sa mga lungsod sa Tudela, San Francisco, Poro, Tuburan, Sogod, Santander, Alcoy ug Dalaguete.
Ang hepe sa Provincial Planning and Development Office, Benigno Cris Lucero, nagkanayon nga mokabat sa P970 milyones ang kantidad sa road projects gikan sa PRDB.
Ang P110 milyones ang gigahin nga bayad sa utang sa probinsiya nga P200 milyones gikan sa Land Bank sa pagpalit og mga heavy equipment.
Sa panglawas, P47 milyones ang gigahin alang sa pagpamalit og mga medical ug dental equipment lakip niini ang construction, pagpaayo o pagpalambo sa health facilities.
Alang sa subsidy sa local government units, ang gobernador adunay P60 milyones nga budget samtang ang bise gobernador adunay P9 milyones ug P34 milyones nga kinatibuk-ang kantidad alang sa Provincial Board.
Giaprobahan usab sa PDC ang P133 milyones nga budget sa Provincial Disaster Risk Reduction Management Office (PDRRMO).
Si Gobernador Hilario Davide III nagkanayon nga ang PDRRMO budget iduso dayun kini ngadto sa PB aron malakip sa 2016 annual budget.
Sa P133 milyones, P27 milyones ang gigahin sa premium sa insurance sa buildings, crops ug volunteers sa probinsiya lakip na ang risk insurance sa World Bank.
Samtang 31 porsyento sa budget o P40 milyones gigahin alang sa disaster preparedness ug ang Quick Respond Fund dunay gahin nga P39.9 milyones o 30 porsiyento sa kinatibuk-ang pundo sa PDRRMO samtang P25 milyones o 19 porsyento sa kinatibuk-ang pundo ang gigahin alang sa prevention ug mitigation.
Ang procurement sa disaster equipment alang sa disaster response activities gigahinan og 13 porsiyento o P17.5 milyones samtang ang P10 milyones o 7 porsiyento gigahin alang sa rehabilitation and recovery. (BANAT NEWS)