CEBU, Philippines – Pormal na’ng gibuksan niadto’ng Biyernes sa hapon gawas sa Cebu Metropolitan Cathedral ang 100 Days Countdown padulong sa 51st International Eucharistic Congress sa dakbayan sa Sugbo.
Gibuksan ang orasan sa mga opisyal sa IEC nga gilangkuban nila’ng Auxiliary Bishop Dennis Villarojo, Auxiliary Bishop Oscar Florencio, Msgr. Marnel Mejia, Msgr. Ruben Labajo, Fr. Brian Brigoli ug Fr. Roberto M. Ebisa.
Atol sa press conference, giawhag ni Labajo ang mga hotel owners ug pension houses nga pakubsan ang balayronon sa mga mopuyo nga mga delegado sa IEC ug dili iparehas sa nilabay nga Asia-Pacific Economic Cooperation (APEC) Meeting.
Malaumon hinuon si Labajo nga mohatag og katumanan ang mga nanag-iya sa mga puluy-anan tungod kay nagkatigum na man sila ug daghan ang nanambong.
Gipahibawo usab ni Labajo nga kutob na lang sunod buwan sila manawat og mga host families nga mopapuyo og delegado diin mahimo ra sila’ng magpakisayud sa ila’ng mga kura paruko kung unsa ang ila’ng buhaton tungod kay aduna kini’y proseso.
Giklaro usab ni Villarojo nga kanunay sila’ng nag-monitor sa mga hotel rate ug kung aduna man sila’y reklamo nga madawat dali ra unya nila matawag ang mga hingtungdan.
Gawas sa mga updates nga gipahigayon may labot sa IEC gisunod usab ang Santos nga Misa nga gidumala ni Archbishop Emeritus Ricardo Cardinal Vidal. (BANAT NEWS)