CEBU, Philippines - Magpasubli sila si Toledo City Mayor John Henry "Sonny" Osmeña ug Bise Mayor Antonio Yapha Jr. human sila niduso kagahapon sa ilang certificate of candidacies. Si Osmeña modagan isip independente samtang si Yapha ubos sa Liberal Party.
Matud pa ni Osmeña gusto siyang mapadayon ang iyang nasugdang mga programa sama sa libreng tubig, pagpanghatag og cash assistance sa mga senior citizens ug uban pa.
Bisan og dili sila pareho og partido, si Yapha adto mosuporta kang Osmeña inay nga kang Konsehal James Yared Gaite kinsa makig-atbang sa mayor ubos sa Liberal Party.
Sa laing bahin, miduso na usab sa ilang COCs sila si Bise Mayor Romeo Villarante nga magpapili pagkamayor ug iyang kapares nga si Konsehal Danny Caballero sa Talisay City.
Si Villarante nagpasakop na sa Nationalists Peoples Coalition (NPC) ug atbangan nila si Mayor John de los Reyes.
Si Villarante nagkanayon nga iyang tagaan og dignidad ang mga kabus ug dili ipakasama nga makililimos. Matud niya, ang iyang grupo maoy nagrepresentar sa tanang sektor sa Talisaynon.
Sa pagkakaron, tulo ka mga pundok ang mag-ilog sa pagkamayor sa dakbayan sa Talisay human una nang nakaduso og kandidatora ang grupo sa Alayon Party pinangulohan ni kanhi kongresista Eduardo “Eddiegul” Gullas. (Raymond Abarcas ug Gabriel Bonjoc/EIM)(BANAT NEWS)