CEBU, Philippines - Lalaki nga nagmaneho og motor patay human nga nakabangga og lalaki nga milabang sa karsada diha sa Luyang, Carmen. Ang namatay naila nga si Jerson Sala, 42, taga Luyang, Carmen, samtang angol ang iyang nabanggaan nga si Isidro Nipa Sr..
Base sa imbestigasyon sa Carmen Police Station nga si Sala padulong mo-overtake og laing motor apan mao say paglabang ni Nipa ug nabanggaan kini, tungod sa kakusog sa pagbangga nisaliring ang motor ug nalamba si Sala sa dalan ug napantok iyang ulo sa karsada.
Gidala ang duha sa Cebu Provincial Hospital sa Danao City apan si Sala gideklarar na nga dead on arrival samtang si Nipa padayon pang giatiman sa mga doktor.
Sa pagsusi sa mga polis sa motor sa namatay aron mailhan nila kini nakaplagan nila ang usa ka kalibre .45 nga pistola sa utility box sa motor.
Samtang tulo ang naangol sa pagkabangga sa dump truck nga ilang gisakyan diha sa daplin sa dalan sa lungsod sa Balamban. Ang mga angol naila nga si Sergio Mayol Jr., drayber, ug ang managsoon nga sila si Renan Mangubat, 25, ug si Wawe Mangubat, 23, taga Borbon.
Nasuta sa imbestigasyon nga palugsong ang dump truck sa barangay Cansomoroy sa Transcentral Highway padulong sa lungsod sa Balamban dihang nawad-an kini og brakes.
Tungod sa kabalaka nga matagak sila sa pangpang gibangga sa drayber ang trak sa pangpang sa kilid sa karsada apan tungod sa kakusog sa pagbangga nangaangol silang tulo ug gidala sa Cebu Provincial Hospital sa Balamban. (BANAT NEWS)