CEBU, Philippines - Walay nagpositibo sa drug test nila ni Mayor Michael Rama, Vice Mayor Edgardo Labella ug sa 30 ka gipaubos sa drug test sa mga department heads, assistant department heads lakip na ang mga bag-ong kawani sa Cebu City Hall.
Kini gitug-an sa pangulo sa Cebu City Office of Substance Prevention (COSAP) Dr. Alice Utlang human migawas ang resulta sa drug test niadtong Martes sa hapon.
Ang paghimo niini pinasubay sa ordinansa nga City Ordinance 1892 kun diin kinahanglan nga ipaubos sa drug test ang tanan kawani sa City Government nga gipangamahanan kaniadto ni Labella ug diin giamendahan ni Konsehal Nestor Archival.
Base sa talaan sa COSAP 20 na ka empleyado sa barangay ang niangkong tiggamitan og ginadiling drugas nga mas daghan kaysa nilabay nga tuig nga wala nakaabot sa napulo.
Matud ni Utlang nga 15 na ka barangay ang napaubos sa drug test ug 15 na usab ka empleyado ang nagpositibo diin sa kinatibuk-an niabot og 35 dala na sa mga niangkong tiggamitan og drugas.
Apan si Utlang nagkanayon, nga dunay kapin napulo pa nga kawani ang wala mapaubos sa drug test nga kinahanglang mopaubos niini.
Nasayran nga nakalakaw na sila dihang gianunsyo nga dunay surprise drug test maong wala sila makaapil ug plano ni Utlang nga kaliton lang sila sa pagpatawag aron mopaubos niini. (BANAT NEWS)