CEBU, Philippines - Nasagmuyo ang mga solo parents nga nitambong sa sesyon sa konseho sa dakbayan sa Sugbo sa miaging Miyerkules tungod sa wa pagpasar sa P40 milyones nga budget alang sa ilang financial assistance.
Daghang solo parents ang nitambong aron paminawon ang pagtuki sa resolusyon ni Konsehal Gerardo "Gerry" Carillo bahin niini nga nalakip sa Supplemental Budget No. 1.
Apan wa kini ipasar sa konseho tungod sa rason nga di sila kwalipikado sa rekisitos nga nalatid sa Solo Parents Ordinance.
Gipaagi una og botasyon sa konseho kun tugotan ba ang pag-release sa pundo apan napulo ka konsehal nga sakop sa Bando Osmeña Pundok Kauswagan ang misupak niini samtang pito lang sa Team Rama ang gusto.
Si Konsehal Margarita Osmeña sa committee on budget and finance mibutyag sa mga tigbalita nga ang rekisitos sa ordinansa nagkanayon nga kinahanglang nakabotar na og tulo ka eleksyon ang solo parent nga hatagan sa financial assistance.
Apan nasayran nga way nakapasar sa mga aplikante sa maong financial assistance tungod niini.
“That’s the reason why the P40 million is not included because they are not eligible,” matud ni Osmeña. Dugang pa niya, naaprubahan ang maong ordinansa niadtong tuig 2014, nagpasabot kini nga sa eleksyon sa 2016, 2019 ug 2022 pa makompleto ang rekisitos.
Si Flordeliza Bonita Regla usa ka solo parent nga nitambong sa sesyon miingon nga dako na unta kaayong tabang kaniya ang P5 mil matag tuig nga cash assistance sa siyudad.
Nagbagulbol siya tungod kay nakagastos na sila sa pag-comply sa mga rekisitos nga gipangayo sa ordinansa apan nausik lang kini. (BANAT NEWS)