CEBU, Philippines - Andam na ang kapulisan sa dakbayan sa Talisay aron pagbantay sa kapistahan ni Sta. Teresa de Avila karong Oktubre 15. Si Superintendent Germano Mallari, hepe sa kapulisan nagkanayon nga iya nang gipresentar ang iyang security preparation sa iyang labaw sa Cebu Provincial Police Office. Adunay daghang polis nga ibutang sa simbahan tungod kay gipaabot nga daghang mga tawo ang manimba nianang adlawa.
"Visible gyud na atong tropa diha sa lugar kun hain daghan ang tawo sa kabalaka nga motumaw ang kasamok kay dili kalikayan nga naa bayay inom-inom," matud pa ni Mallari.
Aduna hinuoy dugang polis gikan sa probinsya nga ipadala aron motabang sa pagbantay. Nagkanayon si Mallari nga basi sa intelligence report wa hinuoy mga robbery groups nga ilang nabantayan nga nangabot gikan sa laing lugar.
Si Mallari mipahimangno sa katawhan nga kung mosimba o manuroy kinahanglan nga adunay ibilin sa panimay o siguro gyud nga sirado ang balay ug dili magdala og mga mahalong butang ug dakong cash aron di matintal ang mga dautang elemento. (BANAT NEWS)