CEBU, Philippines – Nipahigayon og diyalogo ang kagamhanan sa dakbayan sa Lapu-Lapu tali sa liboan ka homeowners sa nagkalain-laing subdivisions sa Hoopsdome kagahapon sa buntag.
Si Police Senior Superintendent Armando Radoc, acting police director sa Lapu-Lapu City Police Office, niawhag sa mga homeowners nga magtinabangay alang sa pagsulbad sa mga "social ills or worldly perpetrators."
"Ato tagaan og paglantaw ang ato’ng subdivision kung unsa’y weakness sa mao’ng lugar. Let us try to re-evaluate ang security measures," matud ni Radoc. Samtang si Mayor Paz Radaza nagkanayon nga magbutang og close-circuit television (CCTV) cameras aron dali’ng mahibaw-an kung kinsa ang magbuhat sa krimen sa mga subdivisions.
Ang diyalogo naggumikan sa pagpatay ni Karen Kaye Montebon, 17-anyos, sulod sa ila’ng panimalay sa Corinthian's Subdivision sa sitio Suba-Masulog, Basak sa niagi’ng Septiyembre 15.
Si Radoc nagkanayon nga angayang susihon sa Criminal Investigation and Detection Group ang babaye’ng igsuon ni Ruben Fernandez nga si Maria Juvelyn "Ibyang" Fernandez kun nahilambigit kini sa insidente.
Ang CIDG-7 nagkanayon nga gikonsiderar nila ang pagpasaka og kaso ni Maria Juvelyn human narekober ang mga gamit nga gipanag-iya sa biktima.
"Ni-instruct ko ni Col. (Marlon) Tayaba i-evaluate usa si Ibyang, kung duna ba siya'y knowledge daan sa wala pa giprenda o gibaligya ang na-recovered nga items kung kinawat ba to," dugang ni Radoc.
Si Radoc ang nangulo sa Special Investigation Task Group diin gi-supervise kini ni Superintendent Rey Lyndon Lawas sa Police Regional Office-7.
Usa ka "Allan" ang ni-turn over sa CIDG-7 og usa ka iPad sa biktima ug usa ka silver wristwatch nga gikataho’ng gipanag-iya ni James Montebon, amahan ni Karen Kaye.
Dugang ni Superintendent Fermin Armendares nga ang live-in partner ni Ruben nga si Jenalyn Soon dili siya "off the hook" sa insidente tungod kay gipaabot pa ang resulta sa forensic examination human sa nakuha nga lugas sa buhok sa crime scene. – /GMR) (BANAT NEWS)