CEBU, Philippines – Patay ang usa ka Cebu-based nga abogado human makaangkon og samad pinusilan sa tuong bahin sa lawas pasado alas 8 kagahapon sa buntag sa barangay Casisang, Malaybalay City, Bukidnon. Nadala pa unta si Atty. Pepito Suello, 63, sa Malaybalay Polymedic Hospital apan namatay kini paglabay sa duha ka oras.
Ang iyang kauban sa sakyanan nga si Atty. Alvy Bertos Damasco, kasamtangang gikustodiya ug nipaubos sa paraffin test. Si PO1 Jeffrey Lloren, desk officer sa Malaybalay City Police Station nga nahinabi sa Banat News miingon nga pasado alas 8 kagahapon sa buntag nagkuyog ang duha ka abogado sakay sa sakyanan ni Suello.
Pag-abot sa barangay Casisang, kalit may buto nga nadungog ug naigo na si Suello maong nitawag sila og polis ug gitabang kini.
Narekober sa mga polis ang usa ka basiyo sa bala ug walay nakita nga “entry hole” apan may exit hole ang pultahan sa driver’s seat sumala pa ni Lloren. Nakuha sa sud sa sakyanan ang usa ka .380 pistol. Sa pagkakaron, wala pa matino kun kinsa ang nagpusil sa abogado, apan sumala pa ni Lloren nga sa miaging gabii naghisgot si Suello kang Damasco nga aduna kini hulga sa kinabuhi. – /EIM) (BANAT NEWS)