CEBU, Philippines – Gibutyag ni Kapitan Teodoro “Balo” Bellesa nga ang libaongon nga karsada ang problema karon sa barangay Poblacion, dakbayan sa Taisay.
Matud niya nga daghan na ang nangreklamo apan ang panudlanan sa barangay ang dili makasarang sa galastuhan sa pagpaayo sa mga karsada.
Daghan na sila og resolusyon nga gipadala sa Kapitolyo apan dili gihapon maato ang budget para sa pagpaayo.
"Aduna mi gamay nga budget unya ayuda sa City Hall pero mao lagi band aid solution ra gyud kay dili man gyud kapasigo sa mga karsadang gubaon," matud ni Belleza.
Gitumbok ang mga dalan sa Deiparine, Tres Aliños lahos sa publiko’ng sementeryo, Uldog, ug uban pa.
Matud ni Belleza nga karaan na ang mga karsada sa ila’ng lugar ug nisamot kaguba human nga mao na kini ang usa sa mga access roads sa South Road Properties.
Laing nakatampo sa pagkaguba mao ang mga dagku’ng sakyanan sa mga kompaniya nga matag adlaw mag-agian.
Nagplano si Belleza ug mga konsehal sa paghangyo sa konseho sa dakbayan nga mogahin og budget alang sa mga karsada’ng gubaon aron ayuhon.
Ang Poblacion magsaulog sa kapistahan ni Sta. Teresa de Avila karong Oktubre 15 ug dugukanan sa mga tawo panahon sa kalag-kalag tungod kay anaa ang publiko’ng sementeryo. – /GMR (BANAT NEWS)