CEBU, Philippines – Nalandig sa tambalanan usa ka pamilyahan human gidasmagan ang ilang gisakyan nga motorsiklo sa laing motorsiklo nga gisakyan sa usa ka Chinese national nga wala’y lisensya pasado alas 8 sa nakalabay nga buntag diha sa barangay Dalahikan sa lungsod sa Samboan.
Ang mga biktima mao sila si Danilo Dinampo, 38, Donna Dinampo, 38, ilang anak nga si Eliana, 6 ug ang ilang silingan nga si Maria Cecilia Villegas, 49. Samtang Chinese national giila nga si Jason Hung, 28, nga temporaryo nga nagpuyo sa lungsod sa Moalboal.
Matud pa ni Police Officer 2 Ressel Jabagat sa Samboan Police nga nahinabi sa Banat News, kusog ang dagan sa suspek ug mikawat na sa ilang lane maong nihunong ang mga biktima apan girumbo na hinuon sila niini.
Ang mga biktima daling gitabok padung sa Dumaguete City aron patambalan ilabi na ang duha ka mga bata.
Sa pag-imbestigar sa kapulisan wala diay lisensya ug passport ang langyaw kay matud pa niya nabilin niya kini sa gipuy-an sa Moalboal. Nasayran nga nangabang lang sa motor ang suspek apan ang sabot di kini mogawas sa lungsod.
“Murag nag-practice pa og drive, swerte siya kay dili dumptruck ang na-engkwentro niya,” saysay pa ni Jabagat. – /EIM) (BANAT NEWS)