CEBU, Philippines - Gipasalig sa Department of Energy ang igo’ng supply sa elektrisidad atol sa transportation ug energy ministerial meetings karong buwana isip kabahin sa Asia-Pacific Economic Cooperation (APEC) 2015 Meeting sa Sugbo.
Si Carmencita Bariso, assistant director sa DOE Policy and Planning Bureau, niingon nga nipasidaan na sila sa mga suppliers ug mga planta sa kuryente nga himuon ang scheduled maintenance sa dili pa ang meetings.
Ang meeting magsugod Oktubre 8 ug molungtad hangtud Oktubre 14 diin ang mga power utilities sama sa Visayan Electric Company ug Mactan Electric Company ang mo-supply sa mga hotels diin ipahigayun ang mga meetings.
Matud ni DOE-7 Director, Engr. Antonio Labios, nga aduna usab sila’y site task group nga giumol ug giandam aron mag-monitor sa kuryente panahon sa meeting.
Dugang niini, 24/7 usab sila nga mag-monitor ug aduna usab sila’y contingency plan kun adunay mahitabo nga unscheduled power interruption.
Nipasalig si Labios nga adunay igo nga reserba sa kuryente ang Visayas Grid diin aduna’y 103 megawatts nga reserba. (BANAT NEWS)