CEBU, Philippines - Ang Provincial Council for the Welfare of Children mipadala og mga sakop aron pagtabang sa 3-anyos nga bata nga giunay sa pag-hostage sa iyang amahan ngadto sa lungsod sa Bogo sa milabay’ng adlaw.
Si Heda Largo, executive assistant sa PCWC mibutyag nga nakig-coordinate sila sa social welfare sa dakbayan sa Bogo kabahin sa bata ug ilang nasayran nga ang maong bata naabuso na usab kaniadto sa iyang paryente.
Apan wala giklaro ni Largo kung ang amahan ba gihapon sa bata ang nangabuso niini.
Matud ni Largo nga nagpuyo na kaniadto sa center ang bata apan ubos sa re-integration sa social welfare gipabalik kini ngadto sa iyang pamilya.
Dugang ni Largo nga kaniadto duna nay napasaka nga kaso batok sa nag-abuso sa bata ug gani duna nay naisyu nga subpoena ang piskal sa naunang kaso ug nagpadayon pa karon ang paghusay niini. Ang technical working group sa PCWC gikatakdang motuki kun angay bang ikustodiya kanila ang bata aron di na masubli pang maabusohan.
Sa laing bahin, gidayeg sa direktor sa kapolisan sa probinsya sa Sugbo , Senior Superintendent Noel Gillamac ang malampusong pag-rescue sa bata gikan sa suspek. Apan gusto subayon sa kapolisan kun nisubay ba sa rules of engagement ang mga polis sa dihang ilang napusilan ang suspek. (BANAT NEWS)