CEBU, Philippines - Hapit na makompleto ang line-up sa mga kandidato sa Bando Osmeña Pundok-Kauswagan (BOPK) alang sa lainlaing puwesto sa dakbayan sa Sugbo nga modagan sa eleksyon karong sunod tuig.
Si kanhi kongresista Tomas Osmeña ug Konsehal Nestor Archival maoy molansar pagka mayor ug bise mayor nga moatbang kanila ni Mayor Michael Rama ug Bise Mayor Edgardo Labella.
Ang mga kandidato sa BOPK pagka kongresista mao sila si Rodrigo Abellanosa (South district) ug Raul del Mar (North district). Sila maoy makigtigi sa mga kandidato sa Team Rama nga sila si Gerry Carillo (south district) ug Alvin Garcia (north district).
Gibutyag ni Osmeña nga ang ilang kandidato pagka konsehal sa south district mao sila si Margot Osmeña ug Eugenio Gabuya nga magpapili pag-usab.
Gawas sa duha, anaa sila si Labangon barangay Captain Victor Buendia, Mambaling barangay kagawad Ann Marie Palomo, City Hall department head Randy Navarro, ug ang basketbolistang si Bonnel Balingit.
Duha pa ang kuwang sa BOPK sa mga konsehal sa south district.
Sa north district, ang mga kandidato sa BOPK pagka konsehal naglakip nila ni Alvin Dizon, Alvin Arcilla, Nida Cabrera, Mary Ann delos Santos, Joy Augustus Young ug Malou Tabar.
Matud ni Osmeña nga ibutyag nila ang uban nilang mga kandidato pipila ka adlaw sa dili pa ang pagpasaka sa mga certificates of candidacy nga magsugod Oktubre 12 hangtud sa 16.
Gihulagway nga ang panagtigi sa kandidato pagka mayor sa dakbayan sa Sugbo usa ka mabulokon tungod kay ikaduha kini nga higayon nga sila si Rama ug Osmeña magsangka pag-usab.
Si Osmeña gipilde ni Rama sa ilang una nga panagsangka kaniadtong 2013. (BANAT NEWS)