CEBU, Philippines - Patay ang usa ka 23 anyos nga guwardiya sa usa ka pabrika sa sitio Capas, barangay Catarman, Consolacion human kini gidunggab sa gikainom nga barkada alas 8 pasado ang takna sa miaging Miyerkules sa gabii.
Si Police Officer 3 Jesson Gayo sa Liloan Police Station miila sa biktima nga mao si Philip Solomon, taga barangay Calero sa Lungsod sa Liloan ug nadestino sa Cebu Fiber Glass Reinforcement nga nahimutang sa maong dapit.
Samtang ang suspek mao si Pablito Cuyos Jr., 26, taga barangay Tayud sa nahisgotang lungsod.
Matud pa ni Gayo nga off duty na sa iyang trabaho ang biktima ug nakig-inom kauban ang suspek apan dunay nahitabo kanilang panaglalis tungod sa gidaghanon sa gitagay nga ilimnon.
Tungatunga sa ilang panaglalis gidunggab ang biktima sa suspetsado diha sa liog, dughan ug uban pang bahin sa lawas nga nakaingon sa hinanali niining kamatayon.
Ang suspetsado mitahan sa iyang kaugalingon ngadto kang Senior Police Officer 4 Marcelino Sevilla ug nagtingkagol na karon sa detention cell. (BANAT NEWS)