CEBU, Philippines – Si Mayor Antonio Canoy sa lungsod sa San Fernando maoy giila sa Liberal Party (LP) nga chairman sa unang distrito sumala pa ni Board Member Raul “Yayoy” Alcoseba.
Si Canoy giingong modagan sa eleksiyon pagka- kongresista sa unang distrito atbang kang Kongresista Gerald Anthony “Samsam” Gullas, Jr. kinsa maoy gipili ni kanhi interior secretary ug LP standard bearer Mar Roxas isip maoy mangulo sa LP sa maong distrito.
Ang Alayon Party ni Gullas nakig-alyansa sa LP apan ang mga miyembro sa LP dili buot nga si Gullas maoy mahimo nilang chairman tungod kay matud nila dili kini “pure LP.”
Si Alcoseba nagkanayon nga mismo si Gob. Hilario Davide III miingon nga dili LP si Gullas apan nalipay sila sa suporta sa maong partido sa gobernador, kang Bise Gob. Agnes Magpale ug kang Roxas.
Alang kang Alcoseba, ang tingog sa gobernador isip maoy chairman sa LP sa probinsiya mao usab kini ang tingog ni Roxas.
“The voice of governor is the voice of Mar Roxas…..as the LP chairman of the province of Cebu he has authority to appoint LP chairman,” pasabot pa ni Alcoseba.
Gipasabot ni Alcoseba nga si Roxas wala mosupak dihang gisultihan sa gobernador nga si Gullas dili pweding mahimong chairman sa LP sa unang distrito. Sa laing bahin, si Gullas nagkanayon nga andam na siya alang sa sunod nga eleksiyon ug bisan unsa pa ang mahitabo wala siya mahulga.
Matud niya nga kung hatagan gihapon siya og mandato andam gihapon siyang moserbisyo sa katawhan sa unang distrito.
Giklaro ni Gullas nga bisan og unsay mahitabo dili mobakwi ang Alayon sa gisaad nga suporta ngadto kang Roxas, Davide ug Magpale.
Dugang ni Gullas nga “no hard feelings” siya sa giingong paghimakak ni Davide nga siya maoy gitudlo ni Roxas nga chairman sa LP sa unang distrito. – /EIM) (BANAT NEWS)