CEBU, Philippines - Nangayo og P10 milyones nga budget sunod tuig ang Cebu City Jail Male Dormitory sa kagamhanan sa dakbayan sa Sugbo alang sa pagkaon sa kapin sa 2,800 ka piniriso.
Si City Jail Warden Jessie Calumpang nipasabot nga ang prisohan nagkinahanglan og pundo aron mapalambo ang serbisyo.
Matud ni Calumpang nga iya na nga napadangat ang problema kang Konsehal David Tumulak kinsa mao’y chairman sa committee on peace and order.
Sa suwat ni Calumpang kang Mayor Michael Rama, kini naghangyo sa pagkamanggihatagon sa kagamhanan sa dakbayan.
Sa pagkaon sa mga piniriso, buot si Calumpang nga dugangan og P10 ang meal allowance sa matag priso nga sa kinatibuk-an mokabat sa P10.2 milyones sa tibuok tuig.
Sa pagkakaron, ang mga piniriso adunay P50 nga meal allowance matag adlaw gikan sa Bureau of Jail Management and Penology nga mao’y standard budget lukop nasud.
Kung ihatag ang gipangayo, mahimo na nga P60 matag adlaw ang pagkaon sa mga piniriso.
Sayo niini ang Police Coordinating and Advisory Council nipasar sa resolusyon sa pagdugang sa meal allowance sa mga piniriso.
Nangayo usab si Calumpang og dugang incentive allowance alang sa 200 ka personnel gikan sa P2,500 matag buwan ngadto na sa tag P4,000 hangtud P5,500.
Lakip sa gipangayo ang generator set, desktop computers with printer, 1,500 litros nga krudo matag buwan ug 20 ka yunit nga handheld radios.
Ang hangyo gitun-an na sa konseho sa dakbayan ug sa Local Finance Committee. (BANAT NEWS)