CEBU, Philippines - Gisirad-an sa kagamhanan sa dakbayan sa Carcar ang baboyan sa barangay Liburon human nasuta nga wala’y permit niadto’ng Miyerkules sa buntag.
Pinangulohan ni Mayor Nicepuro Apura, gipadlakan ang baboyan sa rason nga pakyas kini sa pagkuha sa mga permiso sama sa sanitary, building ug business permits. Ang mao’ng baboyan giingong gipanag-iya sa usa ka magpapatigayon sa dakbayan.
Ang mga opisyal ang nakadawat sab og mga reklamo sa mga residente gumikan sa kabaho sa ila’ng lugar tungod sa kakuwang sa baboyan og drainage, environmental sanitation ug presensya sa open lagoon.
Si Candice Acuña, city public information officer, niingon nga gitagaan og higayon ang tag-iya sa pagkompleto sa mga permits apan hangtud sa pagsira wala gihapon lihoka ang mga papeles.
Ang baboyan nagsugod sa ila’ng operasyon niadto’ng tuig 2011.
Atol sa pagsira, naabtan sa awtoridad ang upat ka minor de edad nga empleyado hinungdan nga sila gi-rescue sa City Social Welfare and Development Office. Nasayran nga adunay balaud nga nagprotehir sa mga minors kalabot sa pagtrabaho sa sayo nila’ng pangedaron. (BANAT NEWS)