CEBU, Philippines – Lima ka panimay ang gibanlas sa kusog nga bul-og sa tubig diha sa sapa sa barangay Candulawan, sa dakbayan sa Talisay sa miaging hapon samtang lapad nga bahin sa Metro Cebu nianang adlawa ang gibahaan usab hangtud pagkagabii.
Ang tigpamaba sa Metro Cebu Water District Charmaine Rodriguez-Kara miklaro nga wala’y dam ubos sa ilang pagdumala ang tuyong gipaawas ang tubig tungod sa kakusog sa uwan, human nga gilunopan ang lapad nga bahin sa Sugbo.
Didto sa Candulawan, gibanlas ang panimalay sa magsuong Felicisima Padigos ug Domingo Tampos samtang naguba ang parte sa mga balay nila ni Belen Carbonillo, Aireen Jaba ug Gerome Padigos tungod sa baha gikan sa bukid.
“Akong gibana-bana murag moabot gyud to og 12 ka tiil ang tubig nga miresulta sa pagkankan sa yuta sa karsada ug gitarukan sa panimay," matud pa ni barangay kagawad Virgilio Bacalso sa Banat News.
Ang mga naapektahang pamilya gipahiklin una sa eskuylahan. Di pa paagian ang karsada dapit sa ilang barangay hall kay kuyaw mahugno.
Usa ka residente nga si Felicisima nga namatyan og anak nga gihaya sa lain nilang payag ang mitug-an nga wa gyud sila'y napunit pagkaanod sa ilang balay. Ang mga naapektuhan nahatagan sa City Social Welfare og mga dinaliang hinabang.
Samtang si konsehal Bacalso niasoy nga mangayo sila og hinabang ni Kongresista Gerald Anthony "Sam-Sam" Gullas alang sa pagpaayo sa ilang karsada.
Sa iyang bahin, si Kara sa MCWD miingon nga aduna nay pundong 5,000 cubic meters ang Buhisan Dam apan mahimo pa kining makapundo og dugang 2,000 cubic meters sa kapasidad niini.
Matud niya ang kalit nga pagkusog sa tubig dala sa ulan di kalikayan nga dunay moawas gikan sa ilang dam, apan giklaro niya nga dili sila basta mopaawas og tubig tungod kay peligro kini sa mga namuyo sa ubos. – /EIM) (BANAT NEWS)