CEBU, Philippines – Nangayo ang kagamhanan sa probinsiya og dugang bayad gawas sa P500 milyones nga tanyag sa kagamhanan sa dakbayan sa Sugbo sa 93-1 nga luna.
Niadto’ng Lunes, si Gobernador Hilario Davide III nipadala og suwat kang Cebu City Mayor Michael Rama kabahin sa mao’ng hangyo.
Tipik sa suwat si Davide nagkanayon nga sama sa kagamhanan sa dakbayan, ang probinsiya may social responsibility usab sa ila’ng mga konstituwente.
Gipasabot ni Davide nga sa taas nga panahon ang kagamhanan sa probinsiya ug ang mga residente nahikawan sa paggamit ug pag-ugmad sa 93-1 hinungdan nga makiangayon lang ang ila’ng hangyo.
Base sa pakisusi sa Technical Working Group sa Kapitolyo, nasuta nga aduna pa’y 32 ektarya nga tipik sa nahisgutang mga luna nga wala pa mabayari sa nga nagpuyo niini.
Kini mobalor na og P2.956 bilyones sa tuig 2011 apan tungod sa sitwasyon, aduna na lang kini’y balor nga P1.8 bilyones.
Ang kagamhanan sa probinsiya nihangyo nga gawas sa P500 milyones nga tanyag, ang kagamhanan sa Sugbo pahatagon og luna ngadto sa probinsiya isip kabahin sa compensation package sa 93-1.
Matud ni Davide nga kaniadto ang kagamhanan sa dakbayan nitanyag sa 3.3 ektarya nga luna nga nahimutang duol sa SM City Cebu bugti sa 93-1.
Sa pakisusi sa Provincial Appraisal Committee, ang mao’ng luna sa dakbayan sa Sugbo aduna’y P1.3 bilyones nga market value karon.
Ang gobernador nagkanayon nga andam ang probinsiya nga modawat sa mao’ng luna isip compensation package o ba kaha tipik sa luna sa Pond A sa South Road Properties nga adunay susama’ng balor.
Si Davide nanghinaut nga sanungon sa kagamhanan sa dakbayan ang hangyo sa probinsiya. – /GMR) (BANAT NEWS)