CEBU, Philippines – Naalarma sila si Kongresista Benhur Salimbangon ug Bokal Joven Mondigo Jr. sa nahitabong tulis sa upat ka turista’ng Chinese sa ilang lugar sa barangay Curva, lungsod sa Medellin niadto’ng Sabado.
Si Salimbangon naalarma sanglit nahitabo sa iya’ng barangay ug adlawan pa sanglit ala una sa hapon nahitabo ang pagpanulis.
“Mura’g wa nama’y kahadlok sa ato’ng kapolisan ang mga tulisan,” matud ni Salimbangon.
Si Salimbangon personal nga nihangyo kang Cebu Provincial Police Office Director Noel Gillamac sa pag-imbestigar sa kaso.
Nabalaka si Salimbangon nga naapektuhan ang turismo ilabi nga nga iya’ng giduso nga mahimo’ng eco-tourism destination ang tibuok distrito diin nahimutang ang isla sa Bantayan ug Malapascua nga naila na sa laing kanasuran.
Si Mondigo niduso usab og resolusyon nga gipasar sa hunta probinsiyal kagahapon nag-awhag kang Gillamac sa paghimo og imbestigasyon.
Si Salimbangon niawhag usab kang Police Regional Office-7 Director Prudencio “Tom” Bañas sa pag-ayuda sa CPPO.
Nagduda si Salimbangon nga konsabo ang nahitabo nga tulis.
“How would they know nga naa’y upat ka tourist nagsakay og awto nga atangan lang didto?” matud ni niya.
Ang upat ka Chinese paingon sa isla sa Malapascua sa Daanbantayan dihang gitulis ang ila’ng gisakyan nga van.
Nakuha sa mga tulisan ang dili mominus P150,000 nga balor sa kwarta ug mga alahas nila’ng Danni Yu, 33; Peijing Zhuang, 63; Jue Zhang, 33; ug Xu Wu, 32, ug sa drayber nga si Jerome Enriquez, 23.
Sabado sa buntag gisugat ni Enriquez ang mga langyaw gikan sa China sa Mactan-Cebu International Airport ug nagpahatud sa isla sa Malapascua. (BANAT NEWS)