CEBU, Philippines – Patay ang drayber sa mini-bus ug grabe’ng naangol ang nagsakay nga pasahero diha’ng nabangga ngadto sa gutter sa karsada sa Oriental Poblacion, lungsod sa Consolacion alas 4 pasado sa kadlawon kagahapon.
Si Police Officer 1 Raymond Lleve sa traffic section sa Consolacion Police Station niila sa drayber nga si James Jon Carpio Artanggo, 40, lumad nga taga Patag, Cagayan ug kasamtangang nagpuyo sa Purok Mangga, Poblacion Oriental.
Si Lleve niingon nga gikan sa dakbayan sa Lapu-Lapu ang mini-bus nga gimaneho ni Artanggo ug padulong unta ang biyahe sa lungsod sa Liloan.
Diha’ng nahidangat sa nahisgutang dapit, gituohan nga nakatagpilaw ang biktima hangtud nabangga.
Gumikan sa kusog nga impact sa pagbangga, naangkon sa biktima ang grabe’ng kadaut sa iya’ng kalawasan ug nadala pa kini sa Mendaro Medical Hospital sa nahisgutang lungsod.
Ang pasahero sa biktima nga si Rechelle Roxas Mabua, 25, taga Purok Mangga, Yati, lungsod sa Consolacion ang nakaangkon usab og mga kadaut sa kalawasan ug nalandig sa Vicente Sotto Memorial Medical Center. – /GMR) (BANAT NEWS)