CEBU, Philippines – Patay ang usa ug nabun-og ang tulo sa managlahing bangga sa Toledo City, Dumanjug ug Moalboal kagahapon.
Si Ramon Aurena, 45, taga Gen. Climaco, Toledo City, nagmaneho sa motorsiklo nga adunay sakay nga si Fertilito dela Cerna, 28, taga Alumnus Basak, San Nicolas, Cebu City nabangga sa utlanan sa gitukod nga karsada sa Canlumampao, Toledo alas 6:30 sa hapon.
Si Aurena kinsa nakaangkon og grabe’ng bun-og sa ulo ang patay na nga nadangat sa tambalanan.
Si Aurena ug dela Cerna gikan sa barangay Kapitan Claudio padulong sa Climaco ug wala nakabantay sa utlanan sa karsada tungod sa kangiob kay wala’y suga ang mao’ng dapit hinungdan sa aksidente ug pagkaangol ni dela Cerna.
Samtang sa Banilad, Tomonoy, lungsod sa Moalboal, usa ka Braul Banga, 45, taga Tubli, sa mao’ng lungsod ang nakaangkon og daghang bun-og diha’ng nabangga ang iya’ng motor sa naghunong nga multicab kagahapon sa hapon.
Ang multicab gimaneho ni Chancel Bajo, 34, taga Balabagon sa mao’ng lungsod.
Si PO3 Edwin Illut niingon nga nabali ang tiil ni Banga hinungdan sa pagkalandig sa tambalanan.
Sa national highway sa Bitoon, Dumanjug, usa ka Alex Carciller, 61, residente sa mao’ng lugar ang nabanggaan sa usa ka motorsiklo diha’ng nitabok sa karsada kagahapon sa buntag.
Si Carciller gidali pagdala sa Barili District Hospital samtang si Raul Pace, 39, taga Paculob, Dumanjug ug drayber sa motorsiklo ang nakaangkon usab og gamay’ng bun-og diha’ng gidala sa Dumanjug Police Station. – /GMR) (BANAT NEWS)