CEBU, Philippines - Nagtingkagol sa Balamban Police Station ang 25-anyos nga lalaki kinsa gireklamo nga niamong-among sa 21-anyos nga babaye sa nakalabay’ng adlaw.
Ang biktima adunay kapuyo ug adunay anak nga kapin sa usa ka tuig ang edad samtang ang suspek nga iya’ng silingan may kapuyo sab.
Matud ni Senior Police Officer 1 Marlon Olasiman nga ang biktima niasoy nga kalit lang nisulod sa ila’ng panimalay ang suspek kay manghuwam og dagom.
Ang biktima didto sa kusina ug gitawag kini sa suspek ug diha’ng niduol kalit kini’ng gibira paingon sa kwarto.
Dugang sa biktima nga wala siya nakasiyagit sa pagpangayo og tabang human gisampungan ang iya’ng baba sa suspek ug giamong- amongan.
Ang biktima nisumbong sa iya’ng kapuyo kinsa nagpatabang sa ama-ama sa pagpangita sa suspek.
Diha’ng nadakpan, ang suspek nagkanayon nga sinabutan nila sa biktima ang nahitabo.
Apan ang biktima desidido gyud nga mopasaka og kaso batok sa suspek. (Raymond D. Abarcas/GMR)(BANAT NEWS)