CEBU, Philippines - Nasagmuyo si Bogo City Mayor Celestino Martinez, Jr. sa Cebu Port Authority (CPA) tungod sa pagsentro lang sa kaugmaran sa mga pantalan sa Metro Cebu. Kini atol sa Provincial Development Council (PDC) Executive Committee meeting kagahapon diin ang CPA nihatag og report sa pag-ugmad sa mga pantalan.
“I would like to congratulate the general manager and the member of the board for having a very good plan but I’m also sad to say nga kami’ng mga mayor mura’g gipalaway lang mi ninyo because your presentations is all about Metro Cebu’s improvement tanan. Hain man mi? Where are we the mayors?” matud ni Martinez. Si Martinez niawhag sa CPA nga mohatag og presentation sa isugyot nga proyekto kabahin sa mga potential port sa probinsiya.
Matud ni Martinez nga makahatag usab sila og potential income sa CPA kung hatagan sila og P450 milyones nga budget alang sa kaugmaran sa ila’ng pantalan sa amihanang bahin sa probinsiya.
“Dunay presentation nga nakita nako nga you are improving Malapascua, you are improving Maya but hain man ang funding? It comes from DOTC and PPA, I would like to listen to the funding coming from CPA,” matud ni Martinez.
Si Edmund Tan, general manager sa CPA, nipasabot nga limitado ang ilang pundo ug ang pundo sa isla sa Malapascua ug Pilar gikan sa Department of Transportation and Communications sa paningkamot ni Kongresista Benhur Salimbangon ug Ace Durano.
Giklaro ni Tan nga kabahin sa Polambato Port sa Bogo, ang CPA dili makahatag og budget tungod kay natugyan na kini ngadto sa lokal nga kagamhanan sa siyudad. Gitun-an sa CPA ang pagbawi sa pantalan aron sila na ang modumala niini.
Si Martinez nagkanayon nga mouyon siya’ng kuhaon pagbalik sa CPA ang pagdumala sa pantalan apan seguraduhon nga adunay himuong development. (Brenda D. Batuto/GMR)(BANAT NEWS)