CEBU, Philippines - Gamay na lang ang nahabiling pundo sa Provincial Disaster Risk Reduction Management Office alang niini’ng tuiga.
Si Provincial Budget Officer Danilo Rodas nibutyag nga sa P121 milyones nga budget, P45 milyones na lang ang nahabilin sa disaster preparedness fund ug P3.5 milyones sa quick response fund.
Matud ni Rodas nga ang PDRRMO pwede mag-realign sa ila’ng budget aron duna sila’y magamit sa pagpangandam sa El Niño sa mosunod nga buwan. Dugang ni Rodas nga ang probinsiya pwede usab mag-supplemental budget apan magdepende kini sa gobernador.
Matud sa tigpamaba sa PDRRMO, Julius Regner, nga namalit sila og mga water tanker, baril ug nigasto sa water catchment facility isip pagpangandam sa El Niño.
Dugang ni Regner nga una sila moduso sa proposed budget alang sa sunod tuig, magtigum una ang Provincial Disaster Risk Reduction Management Council sunod buwan diin tukion ang mao’ng isyu. (BANAT NEWS)