CEBU, Philippines – Gigulgol og sanggot ang liog ug gitabangan og hapak og bato sa usa ka pamilyahan hangtod namatay ang usa ka 49- anyos nga mag-uuma diha sa Sitio Baclao, Brgy. Mabasa sa lungsod sa Argao sayo sa miaging gabii.
Ang biktima naila nga si Vomerito Davis, nagpuyo sa maong dapit, samtang ang mga suspetsado mao sila si Theodoro Camajalan, 46, iyang gisuon nga si Equiliano Camajalan, 43, anak ni Theodoro nga usa ka 16 anyos nga lalaki ug Glenn Basilisco, 25, pag-umangkon sa mga suspek nga silingan ra sa biktima.
Matud pa ni Senior Police Officer 2 Meliton Agadier ang chief intelligence officer sa Argao Police nga nahinabi sa Banat News, ang asawa sa biktima mibutyag nga nagkuyog og inom gikan sa sentro sa barangay ang iyang bana ug ang mga suspetsado.
Apan sa ilang pagpauli nagkalalis si Davis ug si Equiliano kay gustong manghuwam sa suspek og kwarta.
Ang panaglalis miabot sa pagpasakitay hangtud nga nagtinabangay ang mga suspek paglaban kang Equiliano.
Niadtong tungora, nakadala og sanggot si Theodoro ug maoy iyang gitigbas sa biktima samtang ang lain niini nga kauban nagtinabangay paghapak og bato sa lawas sa biktima.
Dihang nalup-og sa yuta ang biktima , gikatahong gigulgol ni Theodoro sa iyang sanggot ang liog ni Davis.
“Gamay na lang ang kuwang maputol na gyud ang liog. Unya kadtong mga samad samad niya agi siguro ‘to sa pagsagang niya sa sanggot, naa pod siya’y mga bun-og murag sa bato nga gihapak,” sigun pa ni Agadier.
Apan sa bersyon ni Theodoro, matud pa ni Chief Insp. Alejandro Batobalonos , hepe sa Argao Police Station, ang sanggot iya sa biktima ug nailog lang niya kini.
Human sa hitabo boluntaryong mitahan sila si Equiliano ug Theodoro, samtang misibat ang 16 anyos ug si Equiliano.
Apan sa gihimo nga follow-up operation sa kapulisan nadakpan ra ‘sab ang duha didto sa ilang balay samtang nangandam pagsibat.
Si Agadier miingon nga ilang nahibaw-an nga mga paryente ra ang biktima ug ang mga suspetsado.
Kasong murder ang ipasaka sa kapulisan sa mga dinakpan. – /EIM) (BANAT NEWS)