CEBU, Philippines – Mokabat sa P120 milyones ang gigahin sa kagamhanan sa dakbayan sa Mandaue alang sa pinansiyal nga hinabang sa 15,000 ka senior citizen sunod tuig. Kini ang gipahibawo ni Bise Mayor Glenn Bercede atol sa pagpanghatag sa dugang tag P500 sa 340 ka senior citizens sa dakbayan.
Gihangop ang maong kasayuran ni Konsehal Demetrio Cortes Jr., chairman sa committee on social services.
Matud ni Cortes nga doble na ang madawat sa mga senior citizens sanglit ang P3,000 sa pagkakaron mahimo na kini’ng P6,000 sunod tuig.
Gitataw niya nga ang mao’ng kantidad ilang bahinon sa tulo ka hugna nga pagpanghatag sa buwan sa Abril, Agosto ug Disyembre.
“Lipay gyud kaayo ko kay makapalit nako sa ako’ng maintenance nga tambal, bayad sa kuryente ug balon sa ako’ng apo,” matud ni Felipe Corporal sa barangay Mantuyong. – /GMR) (BANAT NEWS)