CEBU, Philippines – Gisubhan na ang P35.3 milyones nga balor sa mga proyekto sa karsada, patubig ug public building sa lungsod sa Argao, Dalaguete ug Boljoon.
Sila si Gobernador Hilario Davide III, Bise Gobernador Agnes Magpale ug Kongresista Wilfredo Caminero ang nangulo sa kalihukan.
Si Caminero nagkanayun nga ang farm-to-market road nga adunay gitas-on nga siyam ka kilometro ang magsumpay sa Argao ngadto na sa vegetable market sa Mantalongon, Dalaguete.
Matud ni Caminero nga ang pagsemento sa mga karsada magpadayun hangtud sunod tuig.
Subay niini, gi-instalar sa barangay Bulak, Dalaguete ang P5 milyones nga water system nga magsuplay og tubig ngadto sa mga residente sa lugar.
Usa ka multi-purpose building usab nga nagkantidad og P2 milyones ang gipatukod sa utlanan tali sa lungsod sa Dalaguete ug Argao. Samtang ang lungsod sa Boljoon gisubhan usab ang P4.3 milyones nga barangay hall sa Lunop. Ang kagamhanan sa probinsiya ang nihatag sa P1.2 milyones sa pagpatukod sa barangay hall ug P2 milyones nga multi-purpose building gikan sa nasudnong kagamhanan.
Ang munisipyo nisubo usab sa farm-to-market road sa Lunop nga gigastuhan sa ila’ng 20 porsiyento nga development fund.
Ang karsada magkonektar sa suoton nga lugar sa Boljoon ug Oslob. Si Caminero malaumon nga makuha ang P1.3 bilyones nga budget sa ikaduha’ng distrito alang sa sunod tuig. – /GMR) (BANAT NEWS)