CEBU, Philippines – Patay ang usa ka 22- anyos nga lalaki nga gipusil sa duha ka lalaki nga nagsakay og motorsiklo sa Sector 6, Brgy. Pagsabungan sa dakbayan sa Mandaue kagahapon sa kaadlawon.
Si Police Officer 1 Peter Martinez sa Presinto 3 sa Mandaue City Police Office (MCPO) miila sa namatay nga mao si Yvan Vega Empuerto, 22, nagpuyo sa maong dapit.
Matud pa ni Martinez nga kauban sa biktima ang ig-agaw niini nga si Daniel Vega nga nanglingkod sa daplin sa karsada dihang kalit lang silang gihunongan sa usa ka motorsiklo nga giluwanan sa duha ka wala hiilhing lalaki.
Ang angkas matud pa kalit nga namusil sa biktima sa makaduha ka higayon ug mipabulhot sa pagpadagan palayo sa maong dapit. Ang biktima patay dihadiha.
Si Martinez miingon nga sa pasiunang imbestigasyon nga ilang gihimo ilang nasuta nga wala’y gikaaway ang biktima.
Apan duna sila’y nadawat nga report nga giingong duna kini gibadlong nga silingang dalaga nga nakigrelasyon og minyo ug kini karon usa sa ilang gisubay nga posibleng motibo sa maong pagpamusil. – /EIM) (BANAT NEWS)