CEBU, Philippines – Nasikop sa kapolisan ang konduktor sa bus nga nisakay og laing bus ug namusil sa gikatupad og lingkod kagahapon sa kadlawon.
Ang nasikop naila nga si Ian Neil Auditor, 28, lumad nga taga Bacolod City ug konduktor sa Ceres Bus Liner samtang ang biktima naila nga si James Brian Sanchez, 31, taga Caseres, Oslob, kinsa nakaangkon og samad sa tiyan.
Si PO2 Ressel Jabagat, desk officer sa Samboan Police Station, niingon nga ang suspek nasikop sa kapolisan sa Moalboal human kini nisuway og sibat pasado alas 5 kagahapon sa buntag.
Sumala pa ni Jabagat nga pasado alas 3 sa buntag ang suspek ug iya’ng kauban nga konduktor, Winston Pobe, 23, taga Poblacion, Samboan, nisakay sa Sunrays nga bus padulong unta sa grahian sa Ceres.
Apan diha’ng naabot na sa barangay San Sebastian, Samboan, si Pobe nga naglingkod atubangan sa suspek ug sa biktima nakabantay nga naglalis ang duha.
Sa iya’ng paglingi nakugang siya sa pagtan-aw nga kalit lang nibuto ang .357 revolver sa suspek ug nagkadugo ang tiyan sa biktima.
Nikaratil og dagan ang suspek ug nilayat sa bus ug nidagan kini sa ngitngit.
Ang drayber sa Sunrays bus nideretso sa Santander aron mangayo og tabang nga mahatud sa tambalanan ang biktima.
Sa follow-up investigation sa kapolisan sa Samboan nasuta nga nisakay og Ceres Bus ang suspek hinungdan nga gitawagan ang Moalboal Police Station aron pagpahigayun og road block. Didto nasikop ang suspek sulod sa bus ug nakuhaan sa usa ka .357 magnum revolver nga may upat ka bala ug gitanggong karon sa detention cell sa kapolisan sa Samboan. – /GMR) (BANAT NEWS)