CEBU, Philippines – Kadtong tawo nga gi-salvage ug gilabay didto sa bukid sa Barangay Babag nahibaw-an nga nalambigit diay sa ilegal nga sugal nga swertes didto sa lungsod sa Compostela. Si SPO2 Larry Fernandez sa Compostela Police Station miingon nga ang gipatay nga si Eymard Coliflores, taga Barangay Cabadiangan, Compostela nadakpan na nila kaniadto sa kalambigitan sa swertres.
Gani matud ni SPO3 Fernandez nga si Coliflores napasakaan man og kaso sa hukmanan apan nakagawas lang kay nakabutang og piyansa. Wala pa mahuman ang paghusay sa kaso ni Coliflores sa hukmanan. Kini gani maoy gitutokan karon sa kapolisan nga posibleng ang mipatay kang Coliflores mao ang mga tawo nga naglagot kaniya kay basin og aduna siya’y wala mahatagi sa daog.
Matud pa nga ang asawa ni Coliflores mi-report sa police station nga ang iyang bana gidagit sa unom ka tawo samtang naglingkod kini kilid sa karsada didto sa Sitio Bali-Bali sa Barangay Cogon.
Kalit lang mihunong ang usa ka puti nga van ug unom ka lalaki ang nanganaog ug miguyod ni Coliflores ug gipugos pagpasakay sa van.
Ang mga nakasaksi nakatimaan lang og “963” nga numero sa plate number sa sakyanan tungod sa kakalit sa panghitabo. Duha ka adlaw human sa iyang pagkawala nakit-an na lang ang patay’ng lawas ni Coliflores nga nagtuay na ang liog ug giputos og plastic ang nawong aron dili makaginhawa.
Posible nga gibali-an og liog si Coliflores kay walay nakita nga samad sa lawas sa biktima. – /RUB) (BANAT NEWS)