CEBU, Philippines - Patay ang 31-anyos nga lalaki nga kanhi piniriso sa Cebu Provincial Detention and Rehabilitation Center (CPDRC) human gipusil sa ulo sulod sa iya’ng gipuy-an nga payag-payag sa sitio Ilaya, Poblacion, lungsod sa Dalaguete pasado alas 5 sa nakalabay nga kadlawon.
Giila ang biktima nga si Gerald Gesim, ulitawo ug nagpuyo sa mao’ng dapit. Matud ni Police Officer 3 Jehaziel Huyo-a, desk officer sa Dalaguete Police Station, nga anggulo sa drugas ang ila’ng gitan-aw nga motibo sa hitabo gumikan sa drug paraphernalia sulod sa gipuy-an sa biktima.
Sayo sa kadlawon usa sa mga residente sa dapit ang nakabantay nga duna’y duha ka tawo sulod sa payag-payag ni Gesim ug pagkataudtaud nisipa ang buto-buto sa armas.
Nakit-an na lang sa mga silingan nga nagkadugo na ang biktima ug duna’y samad pinusilan sa ulo ug abaga.
Narekober sa kapolisan sulod sa payag-payag ang tulo ka bala sa .9mm pistol, usa ka slug, tulo ka pakete sa gituohang shabu ug drug paraphernalia. Si Huyo-a niingon nga niadto’ng nakalabay nga tuig lang nakagawas sa prisohan ang biktima gumikan sa kaso’ng pagpanglugos. (Jojo C. Ugdol/GMR)(BANAT NEWS)