CEBU, Philippines - Hingpit na nga napaayo ang Palo Metropolitan Cathedral human nagusbat sa bagyo’ng Yolanda kapin sa usa ka tuig na ang nakalabay.
Sa mao’ng cathedral himuon ang ordinasyon ni Fr. Oscar Florencio karong adlawa isip bag-ong Auxiliary Bishop sa Sugbo.
Matud ni Fr. Cris Militante, coordinator sa social communication sa Archdiocese of Palo, nga mapasalamaton sila tungod kay sulod sa usa ka tuig kapin napaayo nila ang simbahan pinaagi sa pag-ayuda sa katawhan lakip na gikan sa gawas sa nasud.
Wala hinuon niya gibutyag ang kinatibuk-ang gasto sa pagpaayo sa simbahan tungod kay adunay grupo nga niangkon sa pagpaayo sa pipila ka bahin sa simbahan.
Dugang ni Militante nga ang pagkaayo sa simbahan simbolo kini nga magpabilin nga mobarug ug molig-on ang pagtuo sa katawhan bisan pa man sa kalamidad nga motumaw.
Mensahe ni Militante sa katawhan ang pagpaambit kanunay sa mga grasya nga nadawat.
Si Engr. Lito Alimpoos, nagtaud sa dul-an sa gatos ka audio speakers sa simbahan, nibutyag nga nakasugat gyud sila og kalisud ilabi na sa pag-ayo sa sound system nga dili salikwaot paminawon.
Dugang ni Alimpoos nga kung sud-ungon ang Palo Metropolitan Cathedral karon daw sa wala maagii sa bagyo. (BANAT NEWS)