CEBU, Philippines - Pari nga nadestino sa San Vicente Ferrer Parish sa Barangay Bitoon, Dumanjug gipasanginlan nga midagmal sa tindera’g burger, misumbag sa ulo sa babaye kaduha ka higayon ug mibunlot sa iyang buhok.
Si Rev Fr. William Ybañez, 51, gipasanginlan sa 37-anyos nga si Teresita Sambrana nga mihimo’g pangabuso kaniya didto sa tindahan nga iyang gibantayan nga nahimutang sulod sa compound sa simbahan niadtong Miyerkules sa buntag.
Si Sambrana nagpa-blotter didto sa Dumanjug Police Station apan ang pari miadto usab ug misumbong usab sa kapolisan nga giguba nila ni Sambrana ang kandado sa ganghaan sa simbahan.
Matud ni PO3 Rafael Albero Jr., ang desk officer sa Dumanjug Police Station, nga ang burger outlet nga gitrabahoan ni Sambrana nahimutang sulod sa simbahan nga duna’y gate ug kini may kandado.
Gisaysay ni Sambrana nga sayo sa buntag niadtong Miyerkules kauban niya ang iyang manager nga moadto unta sa ilang burger outlet apan dili sila makasulod kay nakakandado ang gate.
Nananghid unta sila si Sambrana sa tigbantay sa simbahan nga mosulod apan wala gihapon sila pasudla, hinungdan nga nakahukom ang manager nga kauban ni Sambrana nga gub-on ang padlock sa gate aron sila makasulod.
Matud ni Sambrana nga samtang nag-andam siya sa iyang mga baligya, miabot si Fr. Ybañez ug misumbag kaniya sa ulo kaduha ka higayon ug gibira ang iyang buhok.
Nasuko ang pari nga giguba nila ni Sambrana ang kandado sa ganghaan sa simbahan. Mipasalig unta sila si Sambrana nga ilisan ra nila ang kandado nga naguba apan gidapatan gihapon siya sa pari.
Human nga nasuwat na sa police blotter ang reklamo ni Sambrana, miabot usab sa police station si Fr. Ybañez ug nagpa-blotter ‘sab.
Ang pari miingon nga human niya masayri nga giguba ang lock sa ganghaan sa simbahan iya unta nga pakigsultihan si Sambrana apan nangisog hinuon ang babaye.
Wala angkona sa pari ang reklamo ni Sambrana nga iyang napasakitan ang tindera’g burger. Gipasabot ni Albero nga kay usa lang ka ordinaryo nga away ang hitabo tali sa pari ug tindera, giawhag nila nga adto usa kini husaya sa barangay.
Si Sambrana nakapakuha na og medical certificate sa posible nga pagpasaka niya’g kaso batok sa pari. Ang kapolisan miingon nga una pa kini nga higayon nga nakadawat sila’g reklamo batok sa pari. (BANAT NEWS)