CEBU, Philippines – Ang mga konsehal nga alyado sa Bando Osmeña Pundok-Kauswagan (BOPK) mikuwestyon kun ngano nga si Mayor Michael Rama wala gayud mohimo’g lakang legal batok sa mga kawani sa Cebu City Hall nga wala makahatag og kwentada sa kuwarta nga gipiyal kanila.
Ang mga konsehal nga sila si Margot Osmeña, Alvin Dizon ug Sisinio Andales miingon nga si Charlie Reyes hangtud karon wala pa makahatag og kompleto nga kwentada giunsa niya paggasto ang kapin P4 milyones nga gihatag kaniya niadtong 2012.
Si Reyes gihatagan og kapin sa P4 milyones gikan sa City Hall aron gastohon sa mga “sports activities” sa lainlaing kabarangayan sa dakbayan sa Sugbo pipila ka buwan sa wala pa ang eleksyon kaniadtong 2013.
Matud sa mga mireklamo nga konsehal nga angay’ng tumanon sa mayor ang tukma nga lagda nga pasakaan og kaso kadtong mga kawani nga dili gayud makahatag og kwentada sa kuwarta nga gipiyal kanila aron pagmatuod nga gigasto kini sa katuyoang pangpubliko.
Si City Treasurer Diwa Cuevas miingon nga kapin pa lang sa P3 milyones ang na-liquidate ni Reyes. Matud ni Mayor Rama nga gimandoan na niya ang City Legal Office nga tan-awon ang maong isyu ni Reyes.
Matud ni Rama nga kun pasakaan man ang mga kawani nga wala maka-liquidate sa kuwarta sa kagamhanan nga gipiyal kanila kinahanglan nga ang tanan ug dili kay si Reyes ra. – /RUB) (BANAT NEWS)