CEBU, Philippines – Mag-uuma nga gipriso tungod sa kaso nga frustrated murder naghikog unta gamit ang garter sa iyang brief sulod sa selda sa Mabolo Police Station kaniadtong Lunes sa kaadlawon.
Gisuwerte pa ang 35-anyos nga si Pricilo Ijurpe, taga Sitio Kambitas, Barangay Babag, dakbayan sa Sugbo kay nakabantay ang mga kauban niya nga priso ug dali nga mipahibalo sa mga polis.
Usa ka piniriso miingon nga si Ijurpe daan na nga mipahibalo sa iyang plano nga maghikog apan kini gitambagan nga dili tukma ang iyang nahunahunaan.
Sumala pa nga problema sa pamilya maoy gitug-an nga rason ni Ijurpe nga siya nakahunahuna nga magpakamatay.
Matud pa nga si Ijurpe mihisgot nga ang katigayonan sa iyang ginikanan gusto nga ilogon sa iyang igsuon nga maoy naninguha nga siya mapasakaan og kaso.
Ilang nabantayan nga si Ijurpe kanunay lang maghilom-hilom ug dili mokatawa. Sa wala pa misuway’g hikog si Ijurpe, nanghatag pa kini og pagkaon diha nga gihatdan sa iyang pamilya.
Wala dayon mabantayi sa ubang piniriso nga gitangtang ni Ijurpe ang garter sa iyang brief ug gihigot sa iyang liog ug ang tumoy didto usab gihikot sa puthaw sa kisame.
Gitun-an karon sa kapolisan kun unsa ang mga butang nga idili aron dili magamit sa mga binilanggo sa pagpakamatay. – /RUB) (BANAT NEWS)