CEBU, Philippines – Nihangyo ang Cebu City Septage Management Board (CCSMB) nga mogamit sa P5 milyones nga budget sa Department of Veterinary Medicine and Fisheries (DVMF) sa pagpaayo sa Septage Treatment Plant.
Una na’ng nisugyot ang pangulo sa DVMF nga si Pilar Romero nga mas maayo’ng paninduton ug palapdan ang STP. Matud ni Romero nga kun magamit ang kwarta sa pagpalambo sa planta mahimo’ng makaproseso ang pasilidad sa hugaw sa mga ihawan ug sa wastewater gikan sa dakbayan.
Sa kasamtangan ang planta makaproseso lang sa mga septic wastes gikan sa kabalayan ug sa mga establesamento sa dakbayan.
Ang planta makaproseso og 75 cubic meters nga septic wastes matag unom ka oras.
Usa ka resolusyon sa CCSMB ang gipadangat sa konseho sa dakbayan ug sa buhatan sa mayor aron ma-realign ang P5 milyones gahin sa DVMF aron sa pagpalambo sa STP.
Si Konsehal Margarita Osmeña, chairman sa committee on budget and finance, nirekomendar nga aprobahan ang hangyo kun makakuha na ang CCSMB og pagtugot gikan sa DVMF ug ni Mayor Michael Rama. – /GMR) (BANAT NEWS)