CEBU, Philippines - Giangkon sa usa ka opisyal sa Police Regional Office-7 nga wala na moagi og bidding ang pagkuha sa mga catering services nga maoy nag-supply sa “packed meals” sa mga polis nga gipakatap sa Sugbo alang sa pagbantay sa seguridad sa APEC Summit.
Gitug-an ni Senior Superintendent Rey Lyndon Lawas, ang directorial staff sa PRO-7, sa pakighinabi sa mga tigbalita nga wa nay panahon aron mag-bidding kay uwahi nang naabot ang budget ug dinalian ang panginahanglan.
Matud niya, ang mga police directors na lang sa tulo ka dakbayan, Cebu City, Mandaue ug Lapu-Lapu maoy nangita og caterers nga mopasibo sa gihatag nga budget sa pagkaon.
“We run short of time, wala na ni miagi og bidding but this was properly screened by the different city directors, the amount was given kanang 300 pesos,” matud pa ni Lawas.
Naalarma hinuon si Lawas sa migawas nga balita sa Banat News nga dunay mga polis ang mireklamo kay ubos kaayo og kalidad ang gipakaon kanila sa caterer ug gimando dayon sa Security Task Force Commander sa APEC Summit, nga si Chief Superintendent Prudencio “Tom” Bañas ang paghimo og imbestigasyon kabahin niini.
Matud pa ni Lawas, siyam ka caterers ang nag-supply og pagkaon sa mga polis, apan gusto nilang tarong nga klase sa pagkaon ngadto sa mga polis bisan mao lang kini budget nga gitagana.
Giklaro usab ni Lawas nga way apil sa budget sa APEC ang katulganan sa mga polis nga magbantay, ug nasayod nang daan ang mga gi-deploy sa sitwasyon maong gimandoan silang daan pagdala og mga gamit nga makatulgan.
Sa laing bahin, gimando ni Mayor Michael Rama kang Konsehal Dave Tumulak nga hatagan og pagkaon ang mga APEC Security Volunteers sa Dakbayan sa Sugbo kay wala man sila giapil sa budget sa mga organizers. Matud pa ni Tumulak gilangkoban sa mga traffic enforcers, mga tanod ug mga sakop sa disaster response teams sa siyudad ang mga volunteers.
Gitahasan usab ni Rama si Vice Mayor Edgardo Labella nga tukion sa sesyon sa Police Coordinating and Advisory Council (PCAC) ang pagdugang sa meal allowance sa mga polis apil kadtong gikan sa ubang probinsya nga gidestino isip APEC security dinhi sa siyudad.
Sa laing bahin, ang local organizing committee sa APEC gikatakdang makig-estorya sa delegation coordinator sa mga delegado kalabot sa tulo ka mga low-level delegates nga misibat ug milarga paingon sa Bohol aron magsuroy-suroy sa tourist destinations sa lugar nga wala mopahibalo sa security nila.
Si Lito Maderazo, nagkanayon nga buot nila nga magparehistro sa ilang information desk ang mga delegadong gustong manuroy alang kini sa ilang seguridad. Ang mga senior officials ug ministers lang ang dunay security package o dunay magsunod-sunod nga security personnel sa tanang panahon.
Apan ang mga low-level delegates wala niini hinungdan nga kinahanglang magpahibawo sila kung asa sila mopaingon aron maabisohan ang mga polis sa lugar nga ilang padulngan. Apan giklaro hinuon ni Maderazo nga dili kini pugsanay kay wa man gidili kanila ang pagsuroy-suroy. (BANAT NEWS)