Gipatukod nga mall gipahunong

CEBU, Philippines – Gipahunong sa Department of Labor and Employment ang proyekto sa usa ka mall sa Mambaling, dakbayan sa Sugbo human dunay peligro nga nakita sa pagtrabaho.

Nakita sa DOLE-7 nga nigamit og monkey ladder ang mga trabahante isip scaffold samtang wala nigamit og Personal Protective Equipment (PPE) sama sa full-body harness, hard hat, safety shoes ug uniporme.

Matud ni DOLE-7 Director Exequiel Sarcauga nga daghan pa sila og nakita nga depekto atol sa inspection niadto’ng Agosto 18.

Lakip niini ang pagka-wala’y safety officer, safety practitioner ug first aider sa construction site.

Wala usab makapakita og lisensiya sa Philippine Contractors Accreditation Board (PCAB) ang 11 ka contractors nga gipangulohan sa Westmin Construction kinsa mao’y general contractor sa proyekto.

Nasuta usab nga wala'y DOLE approved nga Construction Safety and Health Program (CSHP) ang site. Gawas niini matud ni Sarcauga nga ang skilled workers ug heavy equipment operators dili TESDA NC II certified ug giingong wala usab sila'y appointed nga nurse, doctor, ug dentist.

Lakip sa mga kalapasan nga nakita ubos sa OSH ang wala'y rule 1020 registration; wala'y administrative reports sa safety & health; ug wala usab kini guidelines ug pagpatuman sa HIV-AIDS prevention ug control, hepatitis B, tuberculosis, drug-free workplace, ug anti-sexual harassment.

“Our assigned labor laws compliance officer also took note of some violations committed by the establishment under general labor standards,” matud ni Sarcauga. – /GMR) (BANAT NEWS)

Show comments