CEBU, Philippines – Ipasusi ni Cebu Organizing Committee Coordinator sa Asia Pacific Economic Cooperation 2015 Lito Maderazo ang report kalabot sa giingong paglaslas sa allowance sa mga pulis nga nagbantay sa maong kalihukan.
Sigon pa ni Maderazo, ang committee chair sa police deployment mao si Chief Superintendent Prudencio Tom Bañas, hepe sa Police Regional Office (PRO)-7 ug mihimo na usab og pakisusi sa maong isyu.
“There’s a need to verify whether it is true or not, I think the Committee Chair on security which handles the police deployment General Tom Bañas is on top of the situation,” matud ni Maderazo sa report sa CCTN-47.
Si Bañas sa iyang bahin miingon nga ang budget para lang gyud sa pagkaon ug sa ilang galastuhan sa PNP sa Tactical Operation Center. Iyang giklaro nga wala gilaslasan ang allowance sa mga police.
Matud pa niya, base sa iyang nahibaw-an gidili sa Commission on Audit ang paghatag og cash sa mga polis mao nga pagkaon ang ilang gihatag.
Gihulagway niya nga miscommunication ang nahitabo human madungog sa usa ka polis ang pamahayag ni PNP Chief Director Gen. Ricardo Marquez sa pagbisita niini dinhi sa Sugbo sa miaging semana nga P500 ang ilang allowance matag adlaw.
Gipasalig hinuon niini nga dili niya pasagdan ang mga polis nga gi-deploy alang sa mga delegado.
Kahinumdoman nga adunay mipadala og text message nga wala magpailang polis sa CCTN Sayri 47 ug nangutana nganong P150 lang ang ilang allowance nga nadawat matag adlaw. – /EIM) (BANAT NEWS)