CEBU, Philippines – Gihangop sa hunta probinsiyal sa Sugbo ang Grade 8 nga tinun-an sa Philippine Science High School sa lungsod sa Argao tungod sa dungog nga iya’ng gihatag sa probinsiya.
Si Barly Dinalo, 14-anyos, taga lungsod sa Argao, nakakuha og bronze medal sa International Mathematics Wizard Challenge sa Hong Kong nga gipahigayun niadto’ng Agosto 9-12, 2015.
Si Dinalo bugtong Sugboanon nga nakadaug sa kompetisyon sa 138 ka estudyante sa high school ug elementarya sa tibuok rehiyon nga gipadala sa Hong Kong.
Unom ka nasud sa Asya nga gilangkuban sa Pilipinas, China, Hong Kong, Taiwan, Macau ug Indonesia ang nisalmot diin nikabat sa 913 ka estudyante ang nagsangka.
Ang Pilipinas nakakuha og 36 ka silver ug 89 ka bronze.
Ang amahan nga si Benedicto Dinalo, 42, usa ka technician, nibutyag nga gibaligya niya ang ila’ng baka aron lang duna sila’y magasto pag-adto sa Hong Kong.
Hinuon ang eskwelahan ni Barly nihatag og gamay nga pinansiyal nga suporta apan dili paigo aron sila maabot sa Hong Kong.
Matud ni Benedicto nga sukad pa sa elementarya si Barly mag-apil-apil na kini og mga mathematics competition.
Si Barly ang kamaguwangan sa duha niya ka anak.
Kagahapon ang buhatan ni Bise Gobernador Agnes Magpale nihatag og pinansiyal nga tabang kang Barly.
Gawas niini ang hunta probinsiyal nisaad og dugang tabang lakip na ang pag-ilis sa baka sa pamilya’ng Dinalo. – /GMR) (BANAT NEWS)