CEBU, Philippines – Nangunsulta pa gihapon si Senador Grace Poe sa mga lider sa iyang supporters dinhi sa Sugbo kun angay ba siyang modagan pagkapangulo sa nasud o makigpares siya ni bisan kinsang kandidato sa pagka-presidente sama kang Secretary Mar Roxas sa Department of Interior and Local Government.
“Yes I am having consultations with the local leaders. Kaya lang hindi ko pa pwedeng pangalanan sila sapagkat ako din mismo ay hindi pa nagdedeklara at sila rin," matud pang Poe.
Matud pa niya mopahibalo siya sa iyang intensyon sa dili pa ang ika-16 sa bulan sa Oktubre nga mao ang deadline sa pagduso sa certificate of candidacy.
Gipasalamatan hinuon niya si Roxas nga nipili kaniya isip runningmate. Si Roxas daan nang mipadayag nga pabilin siyang bukas alang kang Poe.
“Parehas naman kami na may mga plano. May kanya-kanya kaming lakbay dito kung ano sa tingin namin ang makakabuti sa ating sambayanan at kung papaano makatulong, yun po ang aking gagawin," sumala pa niya. Samtang gipasabot niya nga wala pa siya sa posisyon karon pagtuboy og lokal nga kandidato dinhi sa Sugbo, apan matud niya, iyang suportahan kun si kinsa kadtong adunay dakong matampo sa kalamboan sa Sugbo.
Giklaro usab niya nga wala pa silay opisyal nga kasabotan ni Winston Garcia kinsa gihugonhugonang modagan pagka-gobernador sa Sugbo.
Mitambong usab si Poe sa pagbukas sa USC intramurals ug nakighimamat sa mga estudyante human kini giimbitar sa Tingog Carolinian Party USC Junior Jaycees apan wa pasudli og media sa mga organizers kay di sila buot mapolitika ang kalihokan. (Gikan sa The Freeman/EIM)