CEBU, Philippines - Personal nga mibisita sa dakbayan sa Sugbo kagahapong adlawa ang labing taas nga opisyal sa kapulisan sa nasud aron masubay ang preparasyon sa kalihokan sa Asia-Pacific Economic Cooperation (APEC) Summit nga magsugod karong adlawa.
Si Police Director General Ricardo Marquez luwan sa usa ka chopper anha mitugpa sa Central Command (CENTCOM) ug nakigpulong dayon sa mga tigbalita.
Mihimo ‘sab kini og final pre-deployment meeting sa mga sakop aron tan-awon kung wala na bay kulang sa iyang pagpangandam.
Si Marquez ang naila sa iyang pagkahanas sa pagpatuman sa seguridad sa mga dagkong kalihokan sa nasud nga usa sa mga hinungdan nganong kini ang gipili sa pangulo sa nasud isip hepe sa kapulisan.
Si Marquez maoy nagsiguro sa seguridad sa Santo Papa sa pagbisita niini diha sa Tacloban City.
Gipakatap na ni Sr. Supt. Mariano Natuel Jr., OIC City Director sa Mandaue City Police Office, ang mga augmentation force gikan pa sa Bohol, Siquijor ug Negros Oriental nga nangabot niadtong adlaw’ng Miyerkules. Dunay mga polis nga temporaryo nga gipapuyo sa Norkis ug sa JDS Warehouse samtang duna say nangabang og boarding house aron ilang kapuy-an samtang anaa sila dinhi sa Sugbo aron magbantay sa maong kalihokan.
Gawas sa 120 ka mga polis nga gi-augment sa iyang area, 140 sa iyang mga sakop ang gipakatap.
Wa hinuoy nakitang problema sa dagan sa trapiko si Natuel tungod sa gipatumang re-routing sa siyudad sa Mandaue.
Ang Regional Epidemiology and Surviellance Unit (RESU) sa DOH-7 ug ang Bureau of Quarantine subsob nga nagbantay sa makamatay nga mga sakit nga posibleng madala sa mga delegado nga motambong sa Asia Pacific Economic Cooperation (APEC) Meet.
Lakip usab sa ilang gitan-aw mao ang mga sakit sama sa Middle East Respiratory Syndrome Corona-Virus (MersCov) ug ang Ebola ilabi na dunay mga delegado nga gikan sa nasud diin dunay kasaysayan sa maong mga sakit.
Dunay medical team nga nakaestambay sa mga venue ug mga hotels diin nagpundo ang mga delegado ug kun dunay mga report nga moabot sa ilang operation center mohimo dayon sila og pakisusi. (Jojo Ugdol ug Decemay P. Padilla/EIM)(BANAT NEWS)